Íslenska úlpan fékk nýtt hlutverk í Kaupmannahöfn í síðustu viku með þátttöku 66°Norður á Other Circle hönnunarsýningu sem haldin var í tilefni af hönnuarvikunni 3daysofDesign. Þar var íslenska úlpan sett fram sem tákn um hringrásarhönnun. Í hjarta sýningarinnar var hvít skikkja unnin úr útlitsgölluðum Dyngju úlpum frá 66°Norður.

Skikkjan var upphaflega hönnuð fyrir tónlistarkonuna Shygirl fyrir British Fashion Awards 2023, en fékk nú nýtt líf í rými á sýningunni sem virkjaði öll skynfæri.

Þar mættust íslenskur hljóðheimur og ilmupplifun frá Fischersund, sem mynduðu sterka tengingu við uppruna vörumerkisins.

„Sýningin heppnaðist mjög vel og dró fram þá hugsun sem hefur fylgt 66°Norður í nær 100 ár að hanna flíkur sem endast, eru viðgerðahæfar og geti átt framhaldslíf aftur og aftur," segir Lilja Kristín Birgisdóttir, markaðstjóri alþjóðamarkaða hjá 66°Norður.