Það hefur orðið að skemmtilegri hefð hjá íslenska húðvörumerkinu BIOEFFECT að hanna jólagjafasett í samstarfi við íslenskar listakonur. Í ár var ákveðið að leita nýrra leiða og sækja innblástur í íslenska náttúru.

„Við ákváðum að leita til ferða- og náttúruljósmyndarans Ásu Steinars, sem hefur hlotið mikla athygli fyrir stórbrotnar og áhrifamiklar myndir af íslenskri náttúru,“ segir Liv Bergþórsdóttir, forstjóri Bioeffect.

„Útkoman eru gjafasett sem fanga einstaka fegurð Íslands, þau sameina hrífandi ljósmyndir Ásu við okkar margverðlaunuðu Bioeffect húðvörur þar sem ósnortin náttúra og háþróuð vísindi mætast. Samstarfið reyndist einstaklega ánægjulegt og við erum gríðarlega ánægð með útkomuna,“ segir Liv.

„Ég er mjög stolt af samstarfinu og það er ótrúlega skemmtilegt að sjá myndirnar mínar verða hluti af jólagjafasettunum,“ segir Ása. „Ég hef alltaf elskað að vera úti í íslenskri náttúru og mynda. Sama hversu oft ég ferðast um landið, þá er hver upplifunin einstök – því náttúran er síbreytileg. Bioeffect notar íslensk, náttúruleg innihaldsefni í sínum vörum og því fannst mér samstarfið passa fullkomlega.“

Útgáfu gjafasettanna var fagnað í nýrri verslun fyrirtækisins á Laugavegi 33 og er þetta önnur verslun BIOEFFECT í miðbænum. Ása sagði frá því hvernig hún nálgaðist verkefnið og að hún hefði ákveðið að mynda staði sem endurspegla Ísland best: jökla, eldfjöll og jarðhita. Úr urðu þrjú glæsilega myndskreytt gjafasett. Ljósmyndirnar sem prýða gjafasettin eru teknar á Hveravöllum, við Lakagíga og Mýrdalsjökul. Myndirnar eru allar teknar úr lofti með dróna, en Ása vildi ná að fanga frumkraftana sem móta Ísland; jarðhita, eldvirkni og jökla frá óvenjulegu og nýstárlegu sjónarhorni, ólíku því sem fólk er vant að sjá.

„Það eru verkefni eins og þessi sem gera vinnuna mína svo skemmtilega og gefandi – þegar ég get deilt ástríðunni minni fyrir Íslandi í gegnum myndir sem öðlast nýtt líf í svona fallegu samhengi,“ sagði Ása.

„Margir bíða með eftirvæntingu eftir nýju gjafasettunum frá Bioeffect sem koma út á hverju ári, enda innihalda þau úrval af vinsælustu húðvörum okkar á lægra verði en ef vörurnar eru keyptar stakar,“ segir Liv að lokum.