Hörður Björgvin Magnússon, 18 ára knattspyrnumaður úr Fram, skrifar að öllu óbreyttu undir þriggja ára samning við ítalska stórliðið Juventus í dag. Hörður hefur verið hjá Juventus mestallt þetta ár í láni frá Safamýrarfélaginu og leikið með unglinga- og varaliði þess.
Juventus gerði Fram tilboð í Hörð og þeir Guðmundur Torfason og Þorvaldur Örlygsson, þjálfari Fram, eru komnir til Tórínó til að ganga frá málum við ítalska félagið.
Hörður leikur sem miðvörður og á að baki 23 leiki með yngri landsliðum Íslands. Hann hefur verið fyrirliði í meirihluta þeirra leikja og var fyrirliði U19 ára landsliðsins á þessu ári. Hörður spilaði sex leiki með meistaraflokki Fram í úrvalsdeildinni árin 2009 og 2010.
vs@mbl.is