Stjörnustúlkur í 4. flokki kvenna mættu öflugum jafnöldrum sínum frá Norður-Kóreu á alþjóðlega knattspyrnumótinu Norway Cup sem nú stendur yfir í Noregi.
Ísland hefur aldrei mætt Norður-Kóreu í landsleik í neinum aldursflokki og líklega er leikurinn sá fyrsti á milli liða frá löndunum tveimur.
Stjarnan hafði áður en að leiknum gegn hinu firnasterka norður-kóreska liði kom staðið sig feykilega vel á mótinu og haft betur í fimm leikjum með markatölunni 31:0.
Úrvalsliðið frá Norður-Kóreu er vel þjálfað, agað og skipulagt og vann stórsigur á Stjörnunni, 7:0, í átta liða úrslitum mótsins en það hefur í framhaldi af því tryggt sér sæti í úrslitaleiknum í þessum aldursflokki.
Knattspyrna kvenna er á mjög háu stigi í Norður-Kóreu og kvennalandslið þjóðarinnar er eitt af tíu bestu í heiminum samkvæmt heimslista FIFA. Þá hafa yngri landsliðin verið með þeim sterkustu í heiminum og Norður-Kórea varð á síðasta ári heimsmeistari stúlknalandsliða U17 ára.