Meistarar í máli og myndum

Mikið var um dýrðir á Akureyri í dag og í kvöld þegar Þór/KA varð Íslandsmeistari kvenna í knattspyrnu í annað skipti en liðið hreppti einnig þennan titil árið 2012.

Fjallað hefur verið um leikinn hér á mbl.is í máli og myndum og hér er enn meira af myndum frá þessari sögulegu stund ásamt tilvísunum í fyrri fréttir og viðtöl.

Þór/KA er Íslandsmeistari 2017.

Það var ekki bara lið Þórs/KA sem tók við verðlaunum því Stephany Mayor var útnefnd besti leikmaður Pepsi-deildarinnar og fékk sérstaka viðurkenningu fyrir það úr hendi Guðna Bergssonar eftir leik og áður en Íslandsbikarinn fór á loft.

Stephany Mayor valin best í sumar.

Lára Einarsdóttir er eini leikmaður Þórs/KA sem lék alla leikina bæði Íslandsmeistaraárin, 2012 og 2017, en hún varð meistari 17 ára gömul fyrir fimm árum.

„Ég var alveg pollróleg allan leikinn og vissi að við myndum klára þetta, sama hvenær í leiknum það gerðist. Það var ekkert sem benti til þess að FH myndi skora svo þetta var bara spurning um að koma inn einu marki,“ sagði Lára. 

Viðtalið við Láru: Pollróleg allan leikinn.

Hulda Björg Hannesdóttir, 17 ára Íslandsmeistari, sagði að Halldór Sigurðsson, Donni, hefði strax lagt línurnar fyrir tímabilið.

„Frá fyrsta degi æf­inga var stefnt á titil­inn. Donni kom bara inn og sagði „Við ætl­um að vinna Íslands­meist­ara­titil­inn.“ Það má segja að hon­um hafi tek­ist að selja okk­ur þá hug­mynd strax,“ sagði Hulda.

Viðtalið við Huldu: Búið að vera geggjað sumar.

 Bryndís Lára Hrafnkelsdóttir markvörður sagði að lokaspretturinn á Íslandsmótinu hefði verið erfiður.

„Þetta var orðið dálítið stressandi undir lokin, ég viðurkenni það. Það þroskar okkur mjög mikið sem einstaklinga og lið að geta haldið út allt sumarið. Þetta mót var endalaust og mikið um hlé á því. Það var því erfitt að halda fókus og sérstaklega núna í lokin þegar þetta gat allt farið í vaskinn. Það hefði orðið viðbjóðslega sárt að missa af titlinum.“

Viðtalið við Bryndísi: Þetta mót var endalaust.

Halldór Jón Sigurðsson, Donni, þjálfari Þórs/KA, viðurkenndi að hafa gert mistök í næstsíðasta leiknum þegar liðið tapaði í Grindavík.

„Ég gerði mistök í Grindavík og fór vel yfir það með sjálfum mér. Ég er bara eins og stelpurnar. Við erum í ákveðnu verkefni og maður gerir sín mistök. Úr því sem komið var í þeim leik þá hefðum við átt að halda í stigið og þétta raðirnar. Akkúrat núna er mér nákvæmlega sama því við kláruðum þetta og það er bara geggjað.“

Viðtalið við Donna: Gast lesið úr augunum á þeim.

Anna Rakel Pétursdóttir þurfti að skrópa í skólanum til að spila leikinn.

„Já ég skrópaði í dag og ég held að það hafi verið þess virði. Ég er mjög ánægð með tímabilið hjá mér og okkur og finnst við alltaf hafa komið sterkar til baka eftir mótlæti eins og við sýndum þessum leik í dag. Nú verðum við að hugsa um hvernig við ætlum að verja titilinn á næsta ári. Ég er rétt að byrja og verð pottþétt með liðinu áfram.“

Viðtalið við Önnu: Svo fegin að vera partur af þessu.