„Ekki í fyrsta sinn sem við gefum mark“

„Maður vill alltaf taka þrjú stig á heimavelli, það er alveg klárt mál,“ sagði Almarr Ormarsson, leikmaður Fjölnis, eftir 1:1-jafntefli gegn KR á Extra-vellinum í 5. umferð Pepsi-deildar karla í knattspyrnu.

„En eins og fyrri hálfleikurinn spilaðist þá erum við heppnir að taka stig. Við hefðum getað lent 4:0-undir en eru smá heppnir og förum inn í hálfleik með forystu. Í síðari hálfleik erum við svo að spila vel en gerum klaufaleg mistök og gefum mark.“

KR-ingar uppskáru vítaspyrnu eftir klaufaleg mistök Mario Tadejevic, ekki í fyrsta sinn í sumar hjá Fjölnismönnum.

„Algjörlega og þetta er ekki í fyrsta sinn sem við gefum mark í sumar. Þetta er eitthvað sem við verðum að laga, við eigum enn eftir að halda hreinu. Þá er erfiðara að safna stigum.“

„Við höfum spilað vel í sumar og skorað í öllum leikjunum okkar og nú þurfum við að halda hreinu líka, þá koma stigin. Ef við höldum svona áfram þá hef ég engar áhyggjur af þessu,“ sagði Almarr að endingu.

• Blogga um frétt