Þegar KA tekur á móti Keflavík á Akureyrarvelli í fimmtu umferð Pepsi-deildar karla í knattspyrnu í kvöld er það í fyrsta skipti í fjórtán ár sem þessi félög mætast í efstu deild.
Þau voru síðast bæði í deildinni árið 2004 og þá höfðu Keflvíkingar betur í báðum leikjum liðanna. Þau mættust í fyrstu umferðinni á Akureyrarvelli. Hreinn Hringsson kom KA yfir en Jónas Guðni Sævarsson og Hólmar Örn Rúnarsson svöruðu fyrir Keflavík og tryggðu liðinu 2:1 sigur.
Hólmar er enn í liði Keflavíkur og skoraði einmitt glæsilegt mark í síðasta leik liðsins. Spurning hvort hann hrellir KA-menn aftur í þetta sinn?
Seinni leikur liðanna árið 2004 fór fram í Keflavík og þar tryggði Þórarinn Kristjánsson heimamönnum annan sigur, 1:0.
Félögin mættust hinsvegar í 1. deild árið 2016 og gerðu þá tvívegis jafntefli, 0:0 í Keflavík og 1:1 á Akureyri. Í leiknum fyrir norðan náði Elfar Árni Aðalsteinsson að jafna fyrir KA úr vítaspyrnu í uppbótartíma eftir að Guðmundur Magnússon, núverandi leikmaður Fram, hafði komið Keflavík yfir.
Fyrir leikinn í kvöld er KA í 9. sæti deildarinnar með 4 stig en Keflvíkingar sitja á botninum með eitt stig, sem þeir fengu gegn Stjörnunni í fyrstu umferð deildarinnar.