FH vann öruggan sigur á Víkingi R. í leik liðanna í 9. umferð Pepsi-deildar karla í Kaplakrika í kvöld.
FH komst yfir eftir stundarfjórðungsleik með marki úr vítaspyrnu. Svo virðist sem dómarinn hafi dæmt á brot í teignum eftir hornspyrnu sem FH átti. Úr vítinu skoraði Steven Lennon af miklu öryggi. FH tók yfir leikinn meira og meira eftir markið. Á 23. mínútu bættu FH-ingar við öðru markinu eftir laglega skyndisókn. Var það Jónatan Ingi sem fékk stungusendingu, sneri af sér varnarmanninn og lagði boltann fallega í nærhornið.
FH-ingar tóku meira og meira yfir leikinn eftir því sem leið á hálfleikinn.
Seinni hálfleikur var meira af því sama hjá báðum liðum. FH-ingar héldu boltanum betur og þótt Víkingar hafi átt ágæta spilkafla inn á milli, þá tókst þeim illa að skapa sér alvöru færi. Miðverðir FH áttu góðan leik og helstu tilraunir Víkinga voru föst leikatriði og fyrirgjafir.
Jónatan Ingi, sem var sprækastur af nokkrum sprækum í sóknarlínu FH-inga innsiglaði svo titilinn sem maður leiksins með gullfallegu marki á sjötugustu mínútu. Fékk hann þá boltann á vallarhelmingi Víkinga, hristi af sér mann, skar inn á vinstri fótinn og skoraði með þrumuskoti í fjærstöngina og inn.
Fleiri urðu mörkin ekki og 3:0 sigur FH staðreynd.