Þurfum að fara reyna vinna fótboltaleiki

Ólafur Páll Snorrason
Ólafur Páll Snorrason Víkurfréttir/Sigfús Gunnar

„Það er vont að fá markið á sig þegar lítið er eftir, þetta er svekkjandi,“ sagði hnugginn Ólafur Páll Snorrason, þjálfari Fjölnis, eftir 1:0-tap gegn Grindavík á Extra-vellinum í 9. umferð Pepsi-deildar karla í knattspyrnu í kvöld.

Eina mark leiksins kom á 85. mínútu er Sam Hewson skoraði með glæsilegu skoti utan teigs.

„Hewson getur alveg skotið á markið, hann hefur sýnt það áður og kláraði þetta vel.“

Hefðu Fjölnismenn getað gert eitthvað annað í aðdraganda marksins til að koma í veg fyrir það? „Já, dekka hann til dæmis.“

Ólafur var þó heilt yfir þokkalega sáttur með frammistöðu Fjölnis í kvöld, sérstaklega eftir 6:1-stórtapið gegn Stjörnunni í síðustu umferð.

„Við fengum færi sem ég hefði viljað nýta betur en þetta var betra frá því í síðasta leik, það er engin spurning.“

„Við lögðum upp með að halda hreinu í kvöld, það tókst ekki. Það er samt eitthvað jákvætt í þessum leik miðað við síðustu frammistöðu. Við þurfum samt að fara reyna vinna fótboltaleiki. Nú horfum við fram á veginn, við lítum ekkert til baka,“ sagði hann að endingu.

mbl.is