Annars höfum við ekkert að gera í Meistaradeildina

Eiður Aron Sigurbjörnsson í baráttu við Nicklas Bendtner.
Eiður Aron Sigurbjörnsson í baráttu við Nicklas Bendtner. Morgunblaðið/Hari

Kåre Ingebrigtsen, þjálfari norska meistaraliðsins Rosenborg, var að vonum svekktur eftir 1:0 tap sinna manna gegn Íslandsmeisturum Vals þegar liðin áttust við í fyrri leiknum í undankeppni Meistaradeildar Evrópu í knattspyrnu á Origo-vellinum að Hlíðarenda í gærkvöld.

„Ef við hefðum gert 0:0 jafntefli hefðu það verið góð úrslit fyrir okkur en að tapa leiknum var mjög svekkjandi. Við verðum að vinna þá á heimavelli okkar, annars höfum við ekkert að gera í Meistaradeildina.

Við vissum að ef þeir myndu skora þá kæmi markið úr föstu leikatriði. En við vorum ónákvæmir í öllum leiknum og ég var ekki ánægður með það sem við gerðum á síðasta þriðjung vallarins. Við skutum ekki á markið þegar við fengum tækifæri til þess,“ sagði Ingebrigtsen en miðvörðurinn Eiður Aron Sigurbjörnsson skoraði sigurmark Vals sjö mínútum fyrir leikslok.

Síðari leikur liðanna fer fram á Lerkendal-vellinum í Þrándheimi á miðvikudaginn í næstu viku. Sigurliðið úr rimmunni mætir nær örugglega skoska meistaraliðinu Celtic sem vann 3:0 útisigur gegn armenska liðinu Alaskert.

mbl.is