„Ég mun að sjálfsögðu stilla upp mínu sterkasta liði“

„Ég er ánægður að við skoruðum þrjú mörk, við hefðum líka getað skorað fleiri. Við fengum heldur ekki mark á okkur sem er algjört lykilatriði. Við erum í góðri stöðu fyrir útileikinn, það er bara hállfiekur í einvíginu núna,“ sagði Rúnar Páll Sigmundsson þjálfari Stjörnunnar eftir 3:0 sigur liðsins á Nömme Kalju í undankeppni Evrópudeidarinnar í kvöld.

„Við vissum að þeir yrðu hættulegir í föstum leikatriðum, það er þeirra styrkur og þeir eru með hávaxið lið. En mér fannst við verjast því feikivel í dag. Heilt yfir er ég ánægður að hafa klárað þennan fyrsta heimaleik og nú bíður okkar erfitt verkefni úti.“

Sóknarmennirnir Guðmundur og Þorsteinn Már fóru af velli snemma í seinni hálfleik og Eyjólfur Héðinsson og Jóhann Laxdal komu inná í þeirra stað. Var um varnarskiptingu að ræða?

„Guðmundur og Þorsteinn voru báðir tæpir í náranum og Ævar Ingi veikur. Eyjólfur hefur komið sterkur inn í liðið núna undanfarið og með hann á vellinum gátum við fært Baldur framar. Við héldum góðu jafnvægi í liðinu með Baldur framar á vellinum og svo leysti Jóhann kantstöðuna mjög vel auk þess sem hann var sterkur í föstu leikatriðunum,“ sagði Rúnar.

Hvernig á Rúnar von á að Nömme Kaljuk spili á heimavelli sínum?

„Ég held þeir verði svipaðir heima hjá sér og þeir voru í dag. Þeir munu ekki spila á sínum gervigrasheimavelli heldur á grasvelli sem er UEFA vottaður. En það verður erfitt og þeir eru öflugir og hafa sína styrkleika sem við þurfum að varast. En við sáum í dag að það eru líka með veikleika sem við ætlum að nýta í næstu viku.“

„Ég mun að sjálfsögðu stilla upp mínu sterkasta liði,“ sagði Rúnar að lokum.

• Blogga um frétt