Landsliðskonan Dagný Brynjarsdóttir gæti spilað með Selfossi í Pepsi-deild kvenna í knattspyrnu á seinni hluta tímabilsins en þetta staðfesti hún í samtali við Morgunblaðið í gær.
Dagný hefur farið á einn fund með Selfyssingum þar sem farið var yfir stöðuna en hún eignaðist sitt fyrsta barn fyrir tæpum mánuði. Leikmaðurinn er hins vegar að glíma við meiðsli í mjaðmagrind og gætu meiðslin komið í veg fyrir að hún leiki með Selfyssingum í sumar.
„Ef ég verð ekki 100% heil þá mun ég ekki snúa aftur á knattspyrnuvöllinn í sumar. Ég æfði vel á meðan ég var barnshafandi og tók meira að segja æfingu daginn sem ég eignaðist barnið. Ég var svo mætt aftur á æfingu, fjórum dögum eftir barnsburð þannig að ég er í góðu formi. Ég vil hins vegar ná mér alveg góðri af meiðslunum, áður en ég sný aftur á völlinn. Ég ætla mér ekki að taka neina áhættu með þetta,“ sagði Dagný að lokum í samtali við Morgunblaðið. bjarnih@mbl.is