HK/Víkingur vann góðan 3:1-útisigur á FH í Pepsi-deild kvenna í fótbolta í kvöld. FH var sterkari aðilinn í fyrri hálfleik en HK/Víkingur mikið betri í síðari og voru úrslitin verðskulduð.
HK/Víkingur er þar með kominn í fimmta sæti deildarinnar með 13 stig og er sjö stigum fyrir ofan FH og KR sem sitja í fallsætunum með 6 stig.
Það var algjörlega verðskuldað þegar Eva Núra Abrahamsdóttir skoraði glæsilegt mark á 11. mínútu. Hún tók þá fallegt skot á lofti sem endaði í markvinklinum og kom FH yfir, 1:0.
FH-ingar voru líklegri til að bæta við marki en HK/Víkingur að jafna á næstu mínútum en eftir því sem leið á leikinn komst HK/Víkingur meira inn í leikinn og áttu gestirnir nokkrar fínar tilraunir. Að lokum kom jöfnunarmarkið rétt fyrir hálfleik.
Melkorka Katrín Fl Pétursdóttir tók þá upp á því rífa í hárið á Hildi Antonsdóttur innan teigs og dæmdi Kristinn Friðrik Hrafnsson, góður dómari leiksins, vítaspyrnu. Úr henni skoraði Fatma Kara af öryggi og staðan í hálfleik 1:1.
Kader Hancar kom inn á sem varamaður í sínum fyrsta leik í hálfleik og kom hún með auka kraft í sóknarleik HK/Víkings. Á sjöundu mínútu síðari hálfleiks var hún búin að leggja upp mark. Hún sendi á Hildi sem tók skemmtilega á móti boltanum og lagði hann upp í vinkilinn.
Hancar skoraði svo þriðja markið sjálf rétt fyrir leikslok. Margrét Sif átti þá flotta sendingu á hana og Hancar kláraði með einstaklega snyrtilegri vippu yfir Anítu í markinu og 3:1-sigur HK/Víkings raunin.