Dregið var til 3. umferðarinnar í Evrópudeild UEFA í dag og er nú ljóst hverjum íslensku liðin Stjarnan og FH geta mætt, takist þeim að komast áfram úr 2. umferðinni.
Stjarnan mætir stórliði FC København frá Danmörku í fyrri leik liðanna á fimmtudaginn kemur í 2. umferðinni og fari svo að Garðbæingar komist áfram, bíður þeirra einvígi gegn annaðhvort CSKA-Sofia frá Búlgaríu eða Admira Wacker Mödling frá Austurríki.
FH-ingar eru á leiðinni til Ísrael að etja kappi við Hapoel Haifa og bítast þau lið um að komast áfram í þriðju umferðina. Þar mætir sigurliðið annaðhvort Atalanta frá Ítalíu eða Sarajevo frá Bosníu.
Eins og kom fram fyrr í dag geta Valsarar, nái þeir að leggja Santa Coloma frá Andorra í annarri umferð Evrópudeildarinnar, mætt í 3. umferð tapliðinu úr einvígi Shkëndija frá Makedóníu og Sheriff frá Moldóvu í Meistaradeildinni.