Þór/KA tók á móti ÍBV í fyrsta leik tólftu umferðar Pepsi-deildar kvenna í dag. Leikið var í mígandi rigningu og voru áhorfendur óvenjufáir, ekki nema 234. Þór/KA vann að lokum 2:0-sigur.
Ekki var mikið um tilþrif í fyrri hálfleiknum og rólegt yfir spilamennsku liðanna. Eitt mark leit dagsins ljós en það skoraði Arna Sif Ásgrímsdóttir með skalla eftir hornspyrnu frá Andreu Mist Pálsdóttur.
Þór/KA tók öll völd á vellinum í byrjun síðari hálfleiks og bætti Hulda Björg Hannesdóttir við marki eftir aðra hornspyrnu. Eftir markið fóru Eyjakonur að færa sig upp á skaftið en varnarleikur Þórs/KA var afar þéttur og fundust engar glufur á múrnum þeirra. Smám saman fjaraði svo leikurinn út án teljandi tíðinda og Þór/KA tyllti sér enn og aftur á toppinn í deildinni.
Þór/KA er nú með 32 stig en Breiðablik er með 30 stig og á leik til góða gegn HK/Víkingi á þriðjudaginn. ÍBV er áfram í fimmta sæti með 14 stig.