KR vann gríðarlega óvæntan 2:1-sigur á Íslandsmeisturum Þór/KA í Pepsi-deild kvenna í fótbolta í kvöld. Þór/KA mistókst því að komast í toppsæti deildarinnar.
KR spilaði fyrri hálfleikinn gríðarlega vel. Þór/KA náði ekki að skapa eins mikið og oft áður og hinum megin voru skyndisóknir KR-inga hættulegar. Fyrsta markið kom úr óvæntri átt, en bakvörðurinn Tijana Krstic skoraði á 17. mínútu og kom KR yfir. Hún lét þá vaða upp á vinstri kantinum og boltinn fór yfir Stephanie Bukovec í markinu og í netið.
Þór/KA tók við sér næstu mínútur og fékk Stephany Mayor gott færi er hún komst inn í sendingu og var ein á móti Ingibjörgu Valgeirsdóttur en markmaðurinn varði vel frá henni og var staðan í hálfleik 1:0.
Mayor komst aftur nálægt því að skora á 53. mínútu en Ingibjörg varði fínt skot hennar glæsilega og sá til þess að KR hélt forystunni. Sú forysta breyttist í tveggja marka forystu á 70. mínútu er Mia Gunter skoraði alveg eins mark og Krstic gerði í fyrri hálfleik. Þór/KA minnkaði hins vegar muninn mínútu síðar eftir herfileg mistök Ingibjargar í markinu.
Þór/KA sóttu nokkuð eftir markið en KR hélt út og nældi í þrjú gríðarlega mikilvæg stig.