Stefni því að vera þjálfari næstu 40 ár

Srdjan Tufegdzic.
Srdjan Tufegdzic. Ljósmynd/Sigfús Gunnar

Sr­djan Tufegdzic, eða Tufa eins og hann er kallaður, hefur sent frá sér yfirlýsingu sem birt er á heimasíðu KA en eins og fram kom á mbl.is fyrr í kvöld mun hann láta af störfum sem þjálfari karlaliðs KA í knattspyrnu eftir tímabilið.

Yfirlýsingin frá Tufa;

„Sælt KA-fólk

Eftir fund með stjórn knattspyrnudeildar í gær var tekin sameiginleg ákvörðun um að ég verð ekki þjálfari KA á næsta ári, þannig að 13 ára ferð mín hjá þessu frábæra félagi er á enda.

Þegar ég horfi til baka geng ég mjög stoltur frá borði. Yfir 100 leikir sem leikmaður, þjálfari allra yngri flokka karla og kvenna frá sjöunda og upp í meistaraflokk, aðstoðarþjálfari mfl. í 3 ár og á endanum aðalþjálfari mfl. í 3 ár.

Í öllum þessum störfum lagði ég alltaf allt í sölurnar til að KA sem félag myndi vaxa og verða um leið betra félag og þannig taka skref fram á við.

Að vera þjálfari mfl. var draumur minn í mörg ár og þetta er búið að vera stórkostlegur tími.
Draumurinn var að koma mínu félagi í deild þeirra bestu eftir alltof langa fjarveru meðal þeirra bestu. Strax á mínu fyrsta ári sem aðalþjálfari liðsins tókst það og þá tók við það verkefni að búa til stöðugt úrvalsdeildarfélag. Ekkert gleður mig meira en að sjá að við í KA erum komin á þann stað að vera ósátt við að leikir á móti félögum eins og Val og FH enda með jafntefli. Ekki er langt síðan við vorum að glíma við félög eins og Tindastól, Hött, Hugin o.fl. og tapa þar stigum. Það er því gott að sjá menn svekkta eftir jafntefli á móti sterkustu liðum landsins.

Undanfarin ár höfum við unnið marga flotta sigra innan sem utan vallar og er ég stoltur yfir því að KA sé aftur komið á þann stall að vera meðal fremstu félaga í landinu.

Á þessum tíma hafa fjórtán leikmenn spilað sinn fyrsta Pepsi-deildarleik, þar af ellefu sem eru uppaldir í félaginu. Síðasta rósin í hnappagatið er svo að KA á í dag þrjá fulltrúa í síðasta landsliðshóp U21 karla.

Á endanum langar mig að þakka stjórn, framkvæmdastjóra, starfsfólki félagsins, yngriflokkaráði, iðkendum og foreldrum þeirra fyrir frábært samstarf öll þessi ár. Einnig verð ég að þakka stuðningsmönnum KA fyrir frábært samstarf og geggjaðan stuðning síðustu ár, fyrir það verð ég ævinlega þakklátur.

Þjálfarateyminu mínu þeim Óskari Braga, Eggerti Sigmunds, Srdjan Rajkovic, Petar Ivancic, Önnu Birnu og Helga Steinari þakka ég fyrir frábært samstarf, fórnfýsi og samvinnu. Að lokum vil ég þakka leikmönnum mínum fyrir allt sem við höfum gert saman síðustu ár, það er klárlega þeim að þakka að ég er betri þjálfari í dag en fyrir nokkrum árum.

Takk kærlega fyrir mig.

Ég er þjálfari og stefni því að vera þjálfari næstu 40 ár, hvort sem það er á Íslandi eða erlendis. Það kemur í ljós.

Óska ykkur öllum og KA alls hins besta í framtíðinni.

Áfram KA. Lifi fyrir KA.“

Túfa

mbl.is