„Það er gott að klára þetta sterkt og vinna besta lið landsins. Það var kominn tími á að við næðum úrslitum á móti þessum toppliðum," sagði Dóra María Lárusdóttir, leikmaður Vals, eftir 3:2-sigur á Breiðabliki í Pepsi-deild kvenna í fótbolta í dag.
Breiðablik tryggði sér Íslandsmeistaratitilinn í síðustu umferð og var Dóra sérstaklega ánægð með að vinna toppliðið.
„Maður horfir helst á þessa toppleiki og þetta er eini leikurinn sem við höfum unnið í þeim. Við gerðum jafntefli við Þór/KA og það var kærkomið að ná loksins að vinna. Það var óþarfi að missa þetta niður í smá spennu í lokin því við vorum með tök á leiknum."
Dóra skoraði sitt fyrsta mark í tvö ár í dag, en síðasta mark kom einmitt á móti Breiðabliki í lokaumferðinni árið 2016.
„Mér finnst gaman að skora á móti Breiðablik í lokaumferðinni. Það er langþráð að ná að skora. Maður er alltaf að færast aftar á völlinn svo það hefur verið minna um mörk undanfarin ár, en það er alltaf ljúft að setja hann."
Valur endar í fjórða sæti deildarinnar og vill Dóra sjá liðið gera betur á næstu leiktíð.
„Við vitum að við erum með frábært lið og sterka liðsheild. Við viljum gera betur en við gerðum í ár," sagði Dóra María Lárusdóttir.