Knattspyrnudeild HK hefur gengið frá tveggja ára samningi við besta leikmann sinn á nýliðnu keppnistímabili í Inkasso-deild karla samkvæmt kjöri leikmanna liðsins.
Miðjumaðurinn Ólafur Örn Eyjólfsson gekk frá samningi við HK í dag en Kópavogsliðið vann sér sem kunnugt er sæti í úrvalsdeildinni á dögunum.
Ólafur er 24 ára gamall miðjumaður sem kom 15 ára gamall inn í meistaraflokk HK á sínum tíma en var síðan lengi frá vegna þrálátra meiðsla. Ólafur spilaði með Fjarðabyggð og KV um tíma.
Hann kom til HK á ný í ársbyrjun 2017 og var þá lánaður til Þróttar úr Vogum en kom síðan inn í hóp liðsins fyrir nýliðið tímabil og lék 21 leik á miðjunni. Hann stóð sig það vel að samherjarnir kusu hann leikmann ársins í lok tímabilsins.