Íslenska karlalandsliðið í knattspyrnu var allt komið saman á æfingu í Brussel í morgun en Íslendingar mæta Belgum í lokaleik sínum í Þjóðadeild UEFA á fimmtudagskvöldið.
Það var ánægjulegt að sjá fyrirliðann Aron Einar Gunnarsson vera kominn á móts við landsliðið á nýjan leik en hann hefur ekkert leikið með því síðan á HM í Rússlandi í júní.
Aron Einar tók því rólega á æfingunni en líkt og hjá Cardiff æfir hann lítið sem ekkert en nýtir alla sína krafta í leikina. Aron gekk nokkra hringi með Þorgrími Þráinssyni úr landsliðsnefndinni í byrjun æfingarnar þar sem þeir spjölluðu saman og fór greinilega vel á með þeim.
Birkir Már Sævarsson skokkaði með sjúkraþjálfaranum Friðriki Ellerti Jónssyni en bakvörðurinn sterki hefur verið að jafna sig af meiðslum og ólíklegt þykir að hann verði klár í slaginn gegn Belgunum á fimmtudagskvöldið. Hann gæti hins vegar tekið þátt í vináttuleiknum gegn Katar á mánudaginn.
Eins og áður hefur komið fram eru mikil forföll í íslenska landsliðinu en átta leikmenn eru á sjúkralistanum. Það eru þeir: Gylfi Þór Sigurðsson, Jóhann Berg Guðmundsson, Emil Hallfreðsson, Hólmar Örn Eyjólfsson, Rúnar Már Sigurjónsson, Jón Daði Böðvarsson, Björn Bergmann Sigurðarson og Ragnar Sigurðsson.