Stjörnum prýdd lið í Egilshöll á sunnudag

Rúnar Kristinsson og Eyjólfur Sverrisson hafa samtals leikið 170 A-landsleiki.
Rúnar Kristinsson og Eyjólfur Sverrisson hafa samtals leikið 170 A-landsleiki. mbl.is/Golli

Rúnar Kristinsson, Eyjólfur Sverrisson, Guðni Bergsson, Brynjar Björn Gunnarsson, Birkir Kristinsson, Arnar Grétarsson og alþingismaðurinn Willum Þór Þórsson eru meðal þeirra sem taka þátt í stórleik í Egilshöll á sunnudaginn.

Um er að ræða leik vegna Tommadagsins svokallaða, sem haldinn er til stuðnings við Tómas Inga Tómasson og fjölskyldu hans. Tómas Ingi, sem er yfirþjálfari yngri flokka Fylkis og aðstoðarþjálfari U21-landsliðs Íslands, hefur ekki náð bata eftir að hann fékk gervimjöðm í ársbyrjun 2015, og á þessu ári hefur hann varið yfir 200 dögum inni á spítala. Hann bíður þess nú að komast í aðgerð í Þýskalandi þar sem fjórar aðgerðir hér á landi hafa ekki skilað árangri.

Í leiknum í Egilshöll á sunnudag munu þeir Rúnar Kristinsson og Eyjólfur Sverrisson leiða saman hesta sína í viðureign sem ætla má að verði skemmtileg. Nóg er af valinkunnum kempum í báðum liðum en leikmannalistana má sjá hér að neðan.

„Ég veit að Rúnar er klókur þjálfari, hann veit alveg hvað hann er að gera. Sumir halda að mitt lið sé að fara inn í leikinn til að verjast en við munum koma á óvart. Ég valdi nokkra sóknarsinnaða leikmenn í hópinn, eins og Sigga Ágústs sem skoraði sem dæmi mark á æfingu um daginn og gaf boltann tvisvar, það gerist ekki oft. Nú þegar hópurinn hefur verið tilkynntur þá veit ég að það fer um Rúnar. Það er tilhlökkun í hópnum, við munum fara í leikinn til að sigra,“ segir Eyjólfur, þjálfari „landsliðsins“.

Alþingismaðurinn Willum Þór Þórsson reimar á sig takkaskóna á sunnudaginn.
Alþingismaðurinn Willum Þór Þórsson reimar á sig takkaskóna á sunnudaginn. mbl.is/Kristinn Magnúss.

„Við förum fullir sjálfstrausts inn í leikinn. Ég er með frábæra leikmenn í mínu liði. Ég held að nánast allir leikmenn mínir hafi verið fyrirliðar hjá sínum félagsliðum í gegnum tíðina, nema náttúrulega Hjörvar. Við ætlum að spila sóknarbolta og ég treysti mest á að Willum Þór Þórsson beri uppi sóknarleik okkar, útsjónasamur, teknískur og hraður strákur. Úrslit leiksins munu ráðast á dagsforminu,“ segir Rúnar, þjálfari „pressuliðsins“.

Eins og fyrr segir er Tommadagurinn á sunnudag og hefst dagskráin kl. 9.45 með opinni æfingu fyrir stelpur og stráka á aldrinum 6-12 ára, undir handleiðslu Eyjólfs, Rúnars, Arnars Grétarssonar og fleiri þjálfara. Kostar aðgangur 1.000 krónur fyrir hvert barn. Leikurinn á milli liða Rúnars og Eyjólfs hefst svo kl. 11.

Þeim sem ekki komast á Tommadaginn en langar að styrkja verkefnið er bent á að hægt er að leggja inn á reikning 528-14-300, kt. 0706694129.

Tómas Ingi Tómasson skoraði 65 mörk í 148 leikjum í …
Tómas Ingi Tómasson skoraði 65 mörk í 148 leikjum í efstu deild. mbl.is/Árni Sæberg

Pressulið

Rúni Kristinsson  Þjálfari
Sigurður Þórðarson Búningastjóri
Nökkvi Sveinsson  Liðsstjóri
Róbert Magnússon  Sjúkraþjálfari
Leikmenn
Hjörvar Hafliðason 6 leikir í A liði yngri flokka, 112 leikir í B liði.
Kristján Finnbogason 268 leikir í efstu deild - 20 A landsleikur
Brynjar Björn Gunnarsson  74 A landsleikir
Þormóður Egilsson 239 leikir í Efstu deild - 8 A landsleikir 
Guðni Bergsson (c) 80 A landsleikir
Reynir Leósson 201 leikir í efstu deild
Rúnar Kristinsson 104 A landsleikir
Ingi Sigurðsson 205 leikir í efstu deild
Bjarnólfur Lárusson  165 leikir í efstu deild
Lúðvík Bergvinson 38 leikir í efstu deild
Sigurvin Ólafsson  135 leikir í efstu deild - 7 A landsleikir
Hilmar Björnsson  185 leikir í efstu deild - 3 A landsleikir
Þorsteinn Guðjónsson  53 leikir í efstu deild - 4 A landsleikir
Willum Þór Þórsson  2 samþykkt frumvörp á Alþingi

Landslið

Eyjólfur Sverrisson  Þjálfari
Lúðvík Jónsson  Búningastjóri
Óskar Hrafn Þorvaldsson  Liðsstjóri
Stefán Örn Pétursson Sjúkraþjálfari
Leikmenn
Jörundur Kristinsson 54 leikir í B deild
Birkir Kristinsson 316 leikir í efstu deild - 74 A landsleikir
Gunnar Sigurðsson 131 leikir í efstu deild
Arnar Már Arnþórsson 219 ELO stig
Matthías Sigvaldason 22 leikir í efstu deild
Veigur Sveinsson 10 leikir í bikarkeppni KSÍ
Óli Ingi Skúlason (c) 259 leikir í atvinnumennsku - 36 A landsleikir
Eyjólfur Sverrisson 307 leikir í A-deild Þýsk - 0 leikir í A-deild Ísl.
Jón Steindór Þorsteinsson Stjórnað 287 leikjum sem þjálfari
Arnar Grétarsson 149 leikir í efstu deild - 71 A landsleikur
Sindri Bjarnason 55 leikir í efstu deild
Sigurður Ágústsson Sigur á Dolmatov í hraðskák 2001
Hörður Már Magnússon 135 leikir í efstu deild
Pétur Arason 112 ELO stig
Þorsteinn Sveinsson 36 leikir í efstu deild
Gunnar Oddsson 291 leikur í efstu deild - 3 A landsleikir
mbl.is
Fleira áhugavert
Fleira áhugavert