Íslenska kvennalandsliðið í knattspyrnu mætir Skotlandi í vináttulandsleik á La Manga á Spáni mánudaginn 21. janúar.
Þetta kemur fram á vef KSÍ en um er að ræða fyrsta leik Íslands síðan að Jón Þór Hauksson var ráðinn landsliðsþjálfari í stað Freys Alexanderssonar. Síðasti leikur Íslands var gegn Tékkum í undankeppni HM þann 4. september.
Íslenska landsliðið fór einnig til La Manga í byrjun þessa árs og lék þar vináttulandsleik gegn Noregi sem Noregur vann, 2:1.
Ísland lék síðast gegn Skotlandi í undankeppni EM 2017 og vann þá frækinn 4:0-sigur á útivelli en tapaði 2:1 á heimavelli, þegar íslenska liðið hafði reyndar þegar tryggt sér sæti á EM.
Skotar hafa á sterku liði að skipa sem vann sinn riðil í undankeppni HM í fyrra, þrátt fyrir að vera til að mynda í riðli með Sviss, og leikur því á heimsmeistaramótinu í Frakklandi næsta sumar.