Knattspyrnumaðurinn Ólafur Hrannar Kristjánsson er genginn í raðir Þróttar í Vogum og mun leika með liðinu í 2. deildinni á næstu leiktíð.
Ólafur Hrannar er 28 ára gamall og kemur til Þróttara frá Leikni í Breiðholti en hann hefur leikið með Leiknisliðinu allan sinn feril utan eins tímabils þegar hann spilaði með Þrótti Reykjavík.
Ólafur, sem var fyrirliði Leiknis frá 2013-16, lék hátt í 200 meistaraflokksleiki með Breiðholtsliðinu.
„Ólafur Hrannar er þekktur fyrir leikgleði og vinnusemi og ekki vafi á því að leikreynsla hans mun styrkja okkur í baráttunni næsta sumar. Við bjóðum Óla velkominn í Þrótt og tökum vel á móti honum,“ segir í fréttatilkynningu frá Þrótti Vogum.