Íslenska karlalandsliðið í knattspyrnu gerði markalaust jafntefli við Eistland þegar þjóðirnar áttust við í vináttulandsleik í Katar í dag. Ísland gerði 2:2 jafntefli við Svíþjóð á sömu slóðum fyrir helgi og er enn án sigurs undir stjórn Eriks Hamrén.
Ekki er um alþjóðlegan leikdag að ræða og því flestir leikmenn í íslenska hópnum á mála hjá liðum á Norðurlöndum. Íslenska liðið var sterkari aðilinn í fyrri hálfleik en náði þó ekki að skapa sér mikið af færum. Eistarnir komust smátt og smátt betur inn í leikinn en þegar flautað var til hálfleiks var staðan markalaus.
Ísland gerði þrjár breytingar í hálfleik og sótti af krafti í upphafi síðari hálfleiks. Liðið fékk nokkur fín færi, meðal annars var varið frá Andra Rúnari Bjarnasyni af stuttu færi og Kolbeinn Birgir Finnsson, sem var einna sprækastur í íslenska liðinu í leiknum, átti fína tilraun rétt utan teigs.
Inn virtist boltinn þó ekki vilja og þess í stað slapp íslenska liðið með skrekkinn þegar stundarfjórðungur var til leiksloka. Eistar sóttu þá og áttu skottilraun sem fór af varnarmanni og þaðan í stöngina á íslenska markinu.
Bæði lið reyndu að koma inn sigurmarki undir lokin en það gekk ekki eftir og niðurstaðan markalaust jafntefli í áttunda leik liðsins undir stjórn Eriks Hamrén.
Þrír leikmenn léku sína fyrstu A-landsleiki. Davíð Kristján Ólafsson spilaði allan leikinn og liðsfélagi hans hjá Breiðabliki, Willum Þór Willumsson, kom inn á í sínum fyrsta leik. Það gerði Alex Þór Hauksson, leikmaður Stjörnunnar, einnig og léku þeir síðustu tuttugu mínúturnar.
Fylgst var með leiknum í beinni textalýsingu hér á mbl.is.