Siggi Raggi nálægt því að taka við Ástralíu

Sigurður Ragnar Eyjólfsson kom sterklega til greina sem nýr þjálfari kvennalandsliðs Ástralíu í knattspyrnu og hefði þá stýrt liðinu á heimsmeistaramótinu í Frakklandi næsta sumar.

Þeta er fullyrt á vef The Sydney Morning Herald þar sem segir að Sigurður Ragnar hafi verið næstur í röðinni á eftir Ante Milicic sem á endanum varð fyrir valinu, og að mjótt hafi verið á munum milli þeirra. Milicic hefur ekki þjálfað kvennalið áður en hann hefur til að mynda verið aðstoðarþjálfari karlaliðs Ástralíu á tveimur heimsmeistaramótum, árin 2014 og 2018.

Sigurður Ragnar náði frábærum árangri sem landsliðsþjálfari Íslands og stýrði liðinu meðal annars í 8-liða úrslit á EM 2013 sem er besti árangur í sögu liðsins. Ástralska knattspyrnusambandið hefur áður verið með hann í sigtinu en sambandið vildi fá hann sem aðstoðarmann yfirmanns knattspyrnumála á sínum tíma. Sigurður Ragnar hafnaði því til að gerast aðstoðarþjálfari Rúnars Kristinssonar hjá karlaliði Lillestrøm í Noregi.

Eftir að hafa verið hjá Lillestrøm árin 2014-2016 fór Sigurður Ragnar til Kína og tók við kvennaliði Jiangsu Suning, og hann stýrði svo kínverska kvennalandsliðinu á árunum 2017-2018.

• Blogga um frétt