Nýliðar Fylkis geta verið ánægðir með byrjun sína á Íslandsmóti kvenna í fótbolta því eftir þrjár umferðir er Árbæjarliðið komið með sex dýrmæt stig í vasann.
Ljóst var fyrirfram að baráttan í neðri hluta deildarinnar yrði hörð og tvísýn og Fylkiskonur hafa þegar sent keppinautunum skýr skilaboð um að þær ætli ekki að taka þátt í fallbaráttu í ár. Þær unnu KR 2:1 á mánudaginn, höfðu áður unnið heimaleik gegn Keflavík með sömu markatölu og hafa því hirt sex stig á heimavellinum sem eflaust verður liðinu áfram drjúgur.
Fimm leikir í fyrstu þremur umferðunum hafa endað með 1:0 sigri annars liðsins og sjö alls með eins marks mun. Það segir sitt um hversu jöfn deildin er í ár og í raun er merkilegt að ekkert jafntefli skuli enn hafa litið dagsins ljós.
Valur þurfti að hafa mikið fyrir því að vinna ungt og efnilegt lið Stjörnunnar 1:0 í fyrrakvöld en eins og búast mátti við eru Valur og Breiðablik búin að koma sér fyrir á toppnum og eru einu liðin sem hafa ekki tapað stigum.
Sjá greinina í heild í íþróttablaði Morgunblaðsins í dag en þar er jafnframt birt úrvalslið 3. umferðar, valinn besti leikmaður umferðarinnar og besti ungi leikmaður umferðarinnar ásamt fleiru um deildina.