Akranes stendur svo sannarlega undir nafni sem knattspyrnubær þessa dagana. Gamla stórveldið sem hefur 18 sinnum orðið Íslandsmeistari og 9 sinnum bikarmeistari komst á topp úrvalsdeildar karla í fjórðu umferðinni með sannfærandi sigri á FH, 2:0, og er þar með 10 stig eins og Breiðablik sem vann KA 1:0 á Akureyri.
Skagamenn koma mjög ferskir inn í deildina sem nýliðar. Of snemmt er að spá um hvort þeir blandi sér í baráttuna um meistaratitilinn en síðast var ÍA á toppnum um svipað leyti árið 2012.
Þá voru Skagamenn líka nýliðar í deildinni, fengu fljúgandi start og voru taplausir á toppnum frá þriðju og fram í sjöttu umferð. Eftir það hallaði heldur undan fæti og ÍA hafnaði að lokum í sjötta sætinu.
Það verður fróðlegt að sjá hvort lið ÍA í dag, undir styrkri stjórn Jóhannesar Karls Guðjónssonar, sé tilbúið til að fara lengra í ár.
Sjá greinina í heild í Morgunblaðinu í dag þar sem birt er úrvalslið 4. umferðar, valinn besti leikmaður og besti ungi leikmaður umferðarinnar.