„Þeir náðu að spila sig vel í gegnum okkur og enn og aftur voru föst leikatriði að valda okkur usla," sagði Arnór Gauti Ragnarsson, leikmaður Fylkis, í samtali við mbl.is eftir 0:1-tap fyrir Grindavík í Pepsi Max-deildinni í fótbolta í kvöld.
Fylkismenn sköpuðu sér varla færi í öllum leiknum og hafði Vladan Djogatovic það náðugt í markinu hjá Grindavík.
„Þetta var virkilega þungt. Þetta var ekki erfiður dagur á skrifstofunni hjá markmanninum þeirra og það vantaði mikið hjá okkur í dag, bæði í vörn og sókn. Við mættum ekki nógu vel stefndir í þennan leik."
Þrátt fyrir tvö töp í röð hefur Arnór ekki áhyggjur af gangi mála hjá Fylki. „Alls ekki. Við eigum eftir að stíga upp úr þessu, það er ekki spurning," sagði Arnór.