Klara Bjartmarz, framkvæmdastjóri KSÍ safnar nú gögnum í máli Björgvins Stefánssonar, framherja KR-inga, sem lét út úr sér miður falleg ummæli í vefútsendingu frá leik Hauka og Þróttar R. í 1. deild karla í fótbolta í gærkvöld. Þetta kemur fram á netmiðlunum 433.is.
„Eins og staðan er núna erum við að safna gögnum, knattspyrnan fordæmir alla mismunun,“ segir Klara í viðtali við 433.is.
Björgvin, sem er fyrrverandi leikmaður Hauka, var annar tveggja sem lýstu leiknum á youtube-rás Hauka. Um miðbik fyrri hálfleiks, þegar upp úr sauð á milli leikmanna sem endaði með því að Arnar Aðalgeirsson úr Haukum og Archange Nkumu úr Þrótti fengu gult spjald, sagði hann eftirfarandi:
„Þetta er það sem ég er alltaf að segja. Það er svo stutt í villimannseðlið hjá svarta manninum,“ en Nkumu, sem lék í fjögur ár með KA áður en hann kom til Þróttar í vetur, er dökkur á hörund.
„Ég gerðist sekur um hrapallegt dómgreindarleysi og biðst innilegrar afsökunar á þessum heimskulegu ummælum mínum,“ sagði Björgvin í Twitter-færslu eftir leikinn.
Við viljum ekki sjá fordóma í fótboltanum frekar en í samfélaginu öllu. Fótbolti gengur út á samvinnu, liðsheild, gleði og virðingu. Við berjumst gegn fordómum með fræðslu og kærleik. #Fotboltinet #fyririsland
— Guðni Bergsson (@gudnibergs) May 24, 2019