Liðsmenn Tólfunnar, stuðningsmannafélags íslenska landsliðsins í fótbolta streyma nú á Laugardalsvöll þar sem viðureign Íslands og Albaníu í þriðju umferð undankeppni EM karla í fótbolta hefst klukkan 13.
Gekk hópurinn fylktu liði um Laugardalinn í átt að vellinum þegar blaðamaður varð á vegi þeirra. Gott veður er á höfuðborgarsvæðinu og er það hið ákjósanlegasta bæði fyrir landsliðin en ekki síður áhorfendur.
Fyrr í dag voru enn til um þúsund miðar á leikinn.
Bæði lið eru með þrjú stig eftir tvo leiki í H-riðli. Ísland vann Andorra á útivelli, 2:0, en tapaði svo fyrir Frökkum í Frakklandi, 0:4. Albanía tapaði á móti Tyrklandi á heimavelli, 0:2, í fyrsta leik en vann svo 3:0-sigur á Andorra á útivelli í öðrum leik sínum.