Þegar þremur umferðum er ólokið í Pepsi Max-deild karla í knattspyrnu hafa 120.242 áhorfendur mætt á leikina 114 sem hafa verið spilaðir á mótinu.
Að meðaltali hafa því 1.055 mætt á hvern leik fyrir sig. KR-ingar eru með bestu aðsóknina í sumar en að meðaltali hafa 1.623 áhorfendur mætt á leiki toppliðsins á Meistaravöllum. Sjö af liðunum tólf í deildinni eru með yfir eitt þúsund áhorfendur að meðaltali á heimaleiki sína.
Ef þetta helst til loka tímabilsins verður aðsóknin sú besta í fjögur ár, eða frá 2015 þegar 1.107 manns komu á hvern leik að meðaltali. Þrjú undanfarin ár hefur aðsókn verið undir þúsundinu að meðaltali.
Meðalaðsókn hjá hverju liði fyrir sig er sem hér segir:
1.623 KR
1.394 Breiðablik
1.368 FH
1.232 Fylkir
1.161 ÍA
1.062 Stjarnan
1.048 Valur
999 Víkingur
886 HK
833 KA
615 Grindavík
507 ÍBV