Hörður Björgvin Magnússon hefur neyðst til þess að draga sig út úr íslenska landsliðshópnum sem mætir heimsmeisturum Frakka á föstudaginn og Andorra eftir rúma viku í undankeppni EM í fótbolta.
Hörður meiddist í ökkla í leik með CSKA Moskvu í Evrópudeildinni síðastliðinn fimmtudag og hefur KSÍ nú staðfest að hann missi af landsleikjunum.
Fyrr í dag varð ljóst að Aron Einar Gunnarsson yrði ekki með í leikjunum, einnig vegna ökklameiðsla, en liðband í ökkla hans slitnaði eftir tæklingu í leik með Al Arabi á föstudagskvöld.
Eftir standa 23 leikmenn af þeim 25 sem Erik Hamrén valdi í landsliðshópinn sem kynntur var á föstudag. Tefla má fram 23ja leikmanna hópi í hverjum leik í undankeppni EM.