Ólafur Jóhannesson var í dag ráðinn þjálfari karlaliðs Stjörnunnar til næstu tveggja ára og mun hann starfa við hlið Rúnars Páls Sigmundssonar, sem stýrt hefur Stjörnuliðinu undanfarin sex ár.
Ólafur lét af störfum hjá Val í haust en hann stýrði Valsliðinu í fimm ár og undir hans stjórn varð liðið tvívegis Íslandsmeistari og bikarmeistari í tvígang.
Ólafur, sem er 62 ára gamall, er einn reyndasti og sigursælasti þjálfari landsins en hann hefur verið í þjálfun meira og minna í tæp 40 ár. Hann hóf þjálfaraferil sinn hjá Einherja á Vopnafirði árið 1981 og hefur síðan þá þjálfað Skallagrím, FH, Þrótt Reykjavík, Selfoss, ÍR og Val og þá stýrði hann íslenska A-landsliðinu 2007—'11. FH varð þrisvar sinnum Íslandsmeistari undir stjórn Ólafs og bikarmeistari einu sinni.