Erik Hamrén tilkynnti á blaðamannafundi í dag hvaða leikmenn verða til taks í síðustu tveimur leikjum Íslands í undankeppni EM, útileikjum við Tyrkland og Moldóvu. Fylgst var með fundinum í beinni textalýsingu.
Mikael Anderson kemur nýr inn í hópinn og verður því ekki með U21-landsliðinu gegn Ítölum í næstu viku. Aðspurður hvort að það þýði að Mikael muni spila í leikjunum tveimur með A-landsliðinu gaf Hamrén lítið uppi. Hann sagði Mikael afar spennandi leikmann með forvitnilega hæfileika, sem hefði staðið sig mjög vel undanfarið með Midtjylland í dönsku úrvalsdeildinni.
Emil Hallfreðsson hefur verið í landsliðshópnum í síðustu verkefnum þrátt fyrir að hafa verið án félags en var ekki valinn núna. „Það hefur verið slæmt fyrir hann að vera án félags. Í fyrri verkefnum fannst mér hann mikilvægur fyrir hópinn en þetta gengur ekki til lengri tíma,“ sagði Hamrén.
Hvorki Hamrén né Freyr Alexandersson aðstoðarlandsliðsþjálfari tjáðu sig nokkuð um málefni Kolbeins Sigþórssonar í ljósi óskýrra frétta frá síðustu viku um að hann hefði verið handtekinn. Kolbeinn lék með AIK á laugardag og skoraði, en hann jafnaði markamet Íslands í síðasta mánuði.
Fylgst var með því sem gerðist á fundinum í textalýsingu sem sjá má hér að neðan.
Ísland mætir Tyrklandi í Istanbúl á fimmtudaginn eftir viku, kl. 17 að íslenskum tíma, og leikur svo við Moldóvu sunnudaginn 17. nóvember í lokaumferðinni á sama tíma og Tyrkland sækir Andorra heim.
Ísland á enn von um að komast beint á EM en hún felst í því að vinna Tyrkland og Moldóvu og treysta á að Tyrkland vinni ekki Andorra á útivelli. Að öðrum kosti fer Ísland í umspil í lok mars á næsta ári.