Alfreð Finnbogason fór meiddur af velli á 24. mínútu í leik Íslands og Tyrklands í undankeppni EM 2020 ytra í dag. Alfreð lenti illa eftir samstuð við Caglar Söyuncu, leikmann Leicester, með þeim afleiðingum að hann fór úr axlarlið. Vísir.is greindi frá.
Leiknum lauk með markalausu jafntefli og eru Tyrkir komnir inn á EM, en Ísland þarf að fara í gegnum umspil til að vera með í lokakeppninni á næsta ári.
Alfreð lék ekki með Íslandi í síðasta verkefni vegna meiðsla, en hann hefur verið mikið meiddur að undanförnu. Verður hann ekki með í lokaleik riðilsins gegn Moldóvu ytra á sunnudag.