Íslenska karlalandsliðið í fótbolta þurfti að sætta sig við markalaust jafntefli við Tyrkland ytra í undankeppni EM í kvöld. Ísland er þar með úr leik í baráttunni um að komast beint á EM úr riðlinum á meðan Tyrkir fagna sæti í lokakeppninni.
Ísland leikur í umspili í mars um sæti í lokakeppninni á næsta ári. Ísland hefði getað verið enn á lífi í riðlinum, því Hörður Björgvin Magnússon var hársbreidd frá því að koma Íslandi yfir átta mínútum fyrir leikslok.
Hann skallaði þá að marki eftir hornspyrnu Gylfa Þórs Sigurðssonar en heimamenn björguðu á línu. RÚV birti myndskeið af færinu á Twitter sem sjá má hér fyrir neðan.
Hörður Björgvin svo nálægt því að koma Íslandi í forystu. Demiral bjargar á línu! Fimm mínútur eftir í Istanbúl -> https://t.co/d6DAZZuOL2 pic.twitter.com/tzcL32U9T8
— RÚV Íþróttir (@ruvithrottir) November 14, 2019