Knattspyrnudeild Vals gerði í dag tveggja ára samning við færeyska landsliðsmanninn Magnus Egilsson. Leikmaðurinn kemur til Vals frá HB í Færeyjum, þar sem hann lék undir stjórn Heimis Guðjónssonar, núverandi þjálfara Vals.
Egilsson er 25 ára vinstri bakvörður og var hann í stóru hlutverki hjá HB á síðustu leiktíð. Hann hefur leikið með Val í Bose-mótinu í vetur, en liðið vann einmitt keppnina með sigri á KR í úrslitaleik.
Egilsson lék sína fyrstu leiki með A-landsliði Færeyja í október og lék hann 25 af 27 leikjum HB á síðustu leiktíð. Varð hann færeyskur meistari og bikarmeistari undir stjórn Heimis hjá HB.