Knattspyrnukonan Berglind Björg Þorvaldsdóttir hefur þurft að draga sig úr íslenska landsliðinu vegna kórónuveirunnar en þetta kemur fram á heimasíðu KSÍ. Berglind Björg er samningsbundin Breiðabliki en hún spilar í dag sem lánsmaður hjá AC Milan á Ítalíu.
Kórónuveiran hefur hreiðrað um sig á Norður-Ítalíu og hefur mörgum knattspyrnuleikjum þar í landi verið frestað vegna veirunnar. Alls hafa 400 manns smitast af veirunni á Ítalíu og þar af eru dauðsföllin orðin tólf talsins en ekkert Evrópuland hefur lent jafn illa í veirunni og Ítalía.
Berglind Björg mun því ekki fara með íslenska kvennalandsliðinu til Spánar þar sem liðið tekur þátt í alþjóðlegu móti ásamt Norður-Írlandi, Skotlandi og Úkraínu. Sandra María Jessen, leikmaður Bayer Leverkusen í Þýskalandi, hefur verið kölluð inn í hópinn í hennar stað.