Sara Björk Gunnarsdóttir, fyrirliði íslenska landsliðsins í knattspyrnu, situr ekki auðum höndum þrátt fyrir að geta ekki keppt og æft í Þýskalandi með liði sínu Wolfsburg þessa dagana.
„Ótrúlega skrítin stað sem við erum í, mér persónulega finnst mjög erfitt að vera ekki að æfa núna og spila úti í Þýskalandi með Wolfsburg þar sem við erum á miðju tímabili. En heilsan kemur fyrst,“ segir Sara Björk í myndbandi sem Knattspyrnusamband Íslands birti á facebookvef sínum í morgun.
„Ég hvet alla unga iðkendur til að halda áfram hreyfa sig og hugsa um mataræði, svefn og hvíld,“ sagði fyrirliðinn í hvetjandi skilaboðum til ungs knattspyrnufólks en myndbandið má sjá hér að neðan.
Knattspyrnusamband Íslands hefur hafið birtingu myndbanda á samfélagsmiðlum sínum þar sem um er að ræða æfingar sem krakkar geta framkvæmt ein og sér eða í litlum hópum, og hvatningarmyndbönd þar sem landsliðsfólk hvetur iðkendur til að halda áfram að hreyfa sig og æfa reglulega.
Verkefnið er kallað „Áfram Ísland“ og myndböndin munu birtast daglega á instagram- og facebooksíðum KSÍ en þau verður einnig að finna á youtubesíðu sambandsins.
Við hjá Árvakri viljum vekja athygli á því sem vel er gert á þessum erfiðu tímum. Ef þú ert með góða sögu af fyrirtækjum og einstaklingum sem eru að gera gott, sendu okkur ábendingu á netfangið stondumsaman@mbl.is.