Sara Björk Gunnarsdóttir, fyrirliði íslenska kvennalandsliðsins í knattspyrnu, er í dag orðuð við Spánarmeistara Barcelona í spænska miðlinum Marca. Sara Björk, sem er 29 ára gömul, hefur leikið með Wolfsburg í Þýskalandi frá árinu 2016 þar sem hún hefur þrívegis orðið Þýskalandsmeistari og þrívegis bikarmeistari á þremur tímabilum.
Sara verður samningslaus í sumar en franski fjölmiðillinn RMC Sport fullyrti það um miðjan apríl að Sara Björk væri búin að skrifa undir samning við Lyon í Frakklandi. „Ég hef fengið nokkur tilboð og ég hef nú þegar tekið ákvörðun um það hvar ég mun spila fótbolta á næstu leiktíð,“ sagði Sara Björk í samtali við Marca.
„Barcelona er eitt af stærstu félagsliðum heims og þeir hafa gert frábæra hluti í kringum kvennaliðið sitt á undanförnum árum. Það er mikill heiður fyrir mig sem knattspyrnukonu að vera orðuð við besta lið Spánar. Spænska deildin hefur verið á hraðri uppleið og er ein sú sterkasta í heiminum í dag,“ bætti Sara Björk við.
Sara Björk er ein sigursælasta knattspyrnukona Íslandssögunnar. Hún varð fjórfaldur Svíþjóðarmeistari með Rosengård á árunum 2011 til 2015. Þá hefur hún þrívegis orðið deildarmeistari með Wolfsburg, sem og þrívegis bikarmeistari. Þá á hún að baki 131 A-landsleik fyrir Ísland þar sem hún hefur skorað 20 mörk.