Líklega síðasti leikurinn á ferlinum

Helgi Valur Daníelsson, leikmaður Fylkis í efstu deild karla í knattspyrnu, meiddist illa í leik Fylkis og Gróttu í úrvalsdeild karla, Pepsi Max-deildinni, á Würth-vellinum í Árbænum. Helgi Valur var borinn af velli í síðari hálfeik en hann staðfesti í samtali við mbl.is í morgun að um fótbrot væri að ræða.

Frétt af mbl.is

Tveir fluttir á sjúkrahús af völlunum

„Eins og staðan er núna þá er maður bara að bíða eftir því að komast í aðgerð,“ sagði Helgi Valur. „Ég er fjórbrotinn, semsagt tvöfalt brot á báðum beinum og alveg í sundur. Ég er samt sem áður furðugóður miðað við allt saman og vil núna bara drífa þessa aðgerð af og klára þetta.“

mbl.is/Eggert Jóhannesson

Helgi Valur verður 39 ára gamall hinn 13. júlí næstkomandi en hann segir líklegt að hann sé búinn að spila sinn síðasta leik á ferlinum. Þetta var hans 395. deildaleikur á tuttugu ára meistaraflokksferli og þar af sá 104. í efstu deild hér á landi.

„Það eru miklar líkur á því að þetta hafi verið síðasti leikurinn já. Ég er ekki að svekkja mig of mikið á þessu núna. Ég hef sloppið vel frá meiðslum yfir ferilinn þannig að kannski átti maður þetta bara hálfpartinn inni,“ bætti Helgi Valur léttur við í samtali við mbl.is í morgun.

Helgi Valur á að baki farsælan feril sem atvinnumaður en hann er uppalinn hjá Fylki í Árbænum. Hann lék með Peterborough United, Öster, Elfsborg, Hansa Rostock, AIK, Belenenses og AGF á ferlinum áður hann lagði skóna á hilluna árið 2015. Hann tók þá svo af hillunni árið 2018 og sneri aftur á völlinn með Fylki eftir að hafa flutt heim til Íslands sama ár.

Helgi Valur Daníelsson lék 33 A-landsleiki fyrir Ísland á sínum ferli. mbl.is/Eggert Jóhannesson

• Blogga um frétt