Enska knattspyrnufélagið Arsenal hefur áfrýjað rauða spjaldinu sem framherjinn ungi Eddie Nketia fékk í leik gegn Leicester í fyrradag.
Leiknum lauk með 1:1-jafntefli en bæði lið eru í baráttu um Evrópusæti í úrvalsdeildinni í knattspyrnu. Eddie Nketiah fékk beint rautt spjald hjá Arsenal í seinni hálfleik og í kjölfarið tókst heimamönnum að jafna metin og kreista fram jafntefli.
Mikel Arteta, stjóri Arsenal, var hundsvekktur með rauða spjaldið í viðtölum eftir leik og hefur Lundúnaliðið nú áfrýjað niðurstöðu dómarans. Aganefnd enska knattspyrnusambandsins mun nú taka málið fyrir en Nketiah á yfir höfði sér þriggja eða fjögurra leikja bann.