Fylkir og KR eru komin á topp úrvalsdeildar karla, Pepsi Max-deildarinnar, eftir sigra á FH og Breiðabliki í gærkvöld. Fylkismenn eru á toppnum þar sem markatala þeirra er betri en Íslandsmeistaranna úr Vesturbænum, sem hins vegar hafa leikið einum leik minna.
KR vann verðskuldaðan sigur á Breiðabliki, 3:1, og Blikarnir töpuðu þar með fyrsta leik sínum á tímabilinu. Eftir þrjá sigurleiki í byrjun, þar sem margir töluðu um skyldusigra, eru Óskar Hrafn Þorvaldsson og menn hans án sigurs í þremur leikjum gegn sterkari liðum. Þeirra bíður svipuð prófraun gegn Valsmönnum í næstu umferð.
Á meðan hafa KR-ingar náð fram góðum sigrum á sterkari liðum deildarinnar, en þeir hafa unnið Blika, Skagamenn, Val og Víking, einmitt þau lið sem nú skipa þriðja, fjórða, fimmta og sjötta sætið.
„Táningurinn Stefán Árni Geirsson nýtti tækifærið í byrjunarliðinu eins og á að gera það en hann var besti maður vallarins í fyrri hálfleik. Skoraði mark og ógnaði stöðugt með mjúkum og skemmtilegum hreyfingum sem minna á búlgarska reykingamanninn Dimitar Berbatov.
Heilt yfir var þó miðjumaðurinn Pablo Punyed líklega maður leiksins. Hann skoraði tvö mörk, barðist eins og ljón á miðjunni og er ótrúlega mjúkur og góður á boltann. Breiðablik setti stefnuna á Íslandsmeistaratitilinn fyrir tímabilið en með spilamennsku eins og liðið sýndi í upphafi leiks geta þeir gleymt slíkum pælingum,“ skrifaði Jóhann Ólafsson m.a. um leikinn á mbl.is.
*Stefán Árni Geirsson skoraði fyrsta mark sitt í efstu deild þegar hann kom KR yfir á 2. mínútu, í sjötta leik sínum í deildinni.
Greinina má sjá í heild sinni á íþróttasíðum Morgunblaðsins í dag.