Breiðablik er enn með fullt hús stiga í Pepsi Max-deild kvenna í fótbolta eftir sannfærandi 4:0-sigur á Fylki á útivelli í kvöld. Hefur Breiðablik nú skorað 28 mörk í deildinni í sumar og ekki fengið eitt einasta á sig.
Breiðablik var miklu betri aðilinn í fyrri hálfleik og var 4:0-forysta liðsins í leikhléi verðskulduð. Karólína Lea Vilhjálmsdóttir byrjaði gríðarlega vel og skoraði tvö fyrstu mörkin á fyrstu 14 mínútunum. Voru mörkin afar svipuð, en þau komu með skotum úr teignum eftir að Fylkiskonur náðu ekki að koma boltanum í burtu eftir fyrirgjafir.
Berglind Björg Þorvaldsdóttir bætti við þriðja marki Breiðabliks á 29. mínútu er hún fékk boltann í teignum, sneri á varnarmann og negldi boltanum í netið. Vont varð verra fyrir Fylki á 37. mínútu er Katla María Þórðardóttir fékk boltann í bakið eftir hornspyrnu og þaðan fór hann í netið.
Leikurinn var rólegri í seinni hálfleik og Breiðablik tók fótinn af bensíngjöfinni á meðan Fylkir náði ekki að skapa sér mikið og fleiri mörk voru ekki skoruð.
Breiðablik heldur áfram að vinna hvern leik sem liðið spilar sannfærandi. Blikar fá varla á sig færi og hefur liðið enn ekki fengið á sig mark í sumar. Það er langt síðan lið í deildinni lék eins vel og Breiðablik hefur gert til þessa í sumar og erfitt að ímynda sér að eitthvert lið finni leið til að stöðva Kópavogsliðið það sem eftir lifir tímabilsins.
Breiðablik var gríðarlega sterkt í fyrra og með komu Sveindísar Jane Jónsdóttur er liðið nánast fullkomið. Sonný Lára Þráinsdóttir í marki Breiðabliks var áhorfandi í kvöld og hafði lítið sem ekkert að gera.
Fylkir spilaði virkilega vel á undirbúningstímabilinu og einhverjir spáðu Árbæjarliðinu toppbaráttu í sumar. Eftir ágæta byrjun hefur liðið ekki spilað vel í síðustu leikjum og það vantar meiri kraft í sóknarleikinn.
Það er engin skömm að tapa fyrir Breiðabliki í dag, en Fylkir skapaði sér ekki færi og var aldrei nálægt því að skora. Er tapið það fyrsta hjá Fylki í sumar, en það gæti vakið leikmenn liðsins að fá smáskell. Fylkir getur betur en liðið hefur sýnt í síðasta leiknum og nú verða Árbæingar að sýna úr hverju þeir eru gerðir og svara í næstu leikjum.