Kvennalið KR í fótbolta mun losna úr sóttkví á morgun en aðili innan liðsins greindist með kórónuveiruna á dögunum. Er í annað skipti sem KR fer í sóttkví í sumar en KR-ingar þurftu einnig að fara í sóttkví eftir leik við Breiðablik sem smitaður leikmaður spilaði.
KR mætir Val á heimavelli í Pepsi Max-deildinni á sunnudaginn kemur, en liðið er í níunda sæti af tíu liðum með sjö stig eftir sjö leiki.
Þá losnar karlalið Víkings í Ólafsvík úr sóttkví á miðnætti. Leikmaður liðsins smitaðist af veirunni í síðasta mánuði. Fóru allir leikmenn liðsins í skimum í kjölfarið og komu ekki frekari smit í ljós.
Víkingur mætir Þrótti á Ólafsvíkurvelli á laugardaginn kemur klukkan 18. Ólafsvíkingar eru í níunda sæti með níu stig eftir átta leiki en Guðjón Þórðarson tók við þjálfun liðsins á dögunum.