Gamla ljósmyndin: Glókollarnir
Setja bókamerki
Íþróttadeild Morgunblaðsins og mbl.is heldur áfram að gramsa í myndasafni Morgunblaðsins og birta á mbl.is á laugardögum.
Þeir voru yfirleitt auðþekkjanlegir á velli um miðjan níunda áratuginn knattspyrnumennirnir Pétur Pétursson og Arnór Guðjohnsen. Glókollar sem voru yfirleitt vel hærðir og stundum með hár niður á bak.
Þeir vöktu þó ekki síður athygli fyrir hversu skeinuhættir þeir voru fyrir framan mark andstæðinganna. Báðir héldu þeir í atvinnumennsku árið 1978 eftir að hafa ungir sett svip sinn á Íslandsmótið með ÍA og Víkingi.
Þeim tókst einnig að skapa sér nafn utan landsteinanna. Pétur var í hópi markahæstu leikmanna Evrópu þegar hann lék með Feyenoord og lék með kempum eins og Ruud Gullit og Mario Kempes á ferlinum. Markamet hans í efstu deild Íslandsmótsins frá 1978 hefur ekki enn verið slegið. Arnór var kjörinn leikmaður ársins bæði í Belgíu og Svíþjóð á sínum atvinnumannsferli. Lék þá með Anderlecht og Örebro. Hann lék tvisvar til úrslita í Evrópukeppnum.
Á myndinni má sjá þá félaga kampakáta innan um unga stuðningsmenn eftir landsleik gegn Sovétríkjunum á Laugardalsvellinum haustið 1986. Leikurinn var í undankeppni EM 1988 og lauk með jafntefli 1:1 en Arnór skoraði mark Íslands. Sovétmenn fóru alla leið í úrslitaleik keppninnar en töpuðu þar fyrir Hollendingum.
Myndina tók Einar Falur Ingólfsson sem starfað hefur fyrir Morgunblaðið og mbl.is í áratugi.
Arnór lék 73 A-landsleiki og skoraði 14 mörk á árunum 1979-1997 en Pétur lék 41 A-landsleik á árunum 1978-1990 og skoraði 11 mörk.
Arnór hlaut sæmdarheitið Íþróttamaður ársins hjá Samtökum íþróttafréttamanna árið 1987.
„Þögnin er ærandi“
„Menn eru bara búnir að forgangsraða“
Markaðurinn hitnar og leiguverð hækkar hratt
Kvikan virðist nú skiptast til helminga
Benda á Samgöngustofu sem bendir út í heim
Mikil skjálftavirkni á landinu áhyggjuefni
Þrjú og hálft ár fyrir skotárás í Úlfarsárdal
Ofsóttur innan veggja Boeing