Ekki fallegasti fótboltinn en við vildum bara þrjú stig

„Mér finnst bara  bara bónus að skora mörk, samt alltaf jafn gaman að skora,“  sagði Ásgeir Eyþórsson sem var mjög öflugur í vörn Fylkis og skoraði líka fyrsta mark Fylkis í 2:1 sigri á Víkingum í Árbænum í kvöld þegar leikið var í efstu deild karla í knattspyrnu, Pepsi Max deildinni.

„Við töpuðum illa í síðasta leik og þurftum að þétta vörnina, fórum í fjögurra manna vörn og þéttum liðið og þetta var ekki fallegasti fótbolti sem við höfum spilað í sumar en við vildum bara ná í þrjú stig. Mér fannst Víkingar vera meira með boltann og við vissum að þeir væru mjög léttleikandi og erfitt að ráða við þá en gerðum vel með í því að ráða við þá, sérstaklega fyrri partinn en svo slaknaði aðeins á okkur seinni partinn í fyrri hálfleik og þeir lágu á okkur í lokin en við siglum þessu heim.“

Með sigrinum komst Fylkir í 4. sæti deildarinnar.   „Við þurftum sigur til að efla okkur, viljum vera ofar í stigatöflunni og sýnum að við getum nálgast liðin efst en þetta er ekkert nema vinna og við erum að bæta okkur og nálgast þessi lið,“  bætti Ásgeir við.

• Blogga um frétt