„Mér fannst við spila frábærlega og við áttum þessi þrjú stig skilið,“ segir Gunnhildur Yrsa Jónsdóttir, leikmaður kvennaliðs Vals í knattspyrnu. Valur vann ótrúlegan 7:0 sigur á liði Fylkis í Árbænum í Pepsi Max deild kvenna í knattspyrnu í kvöld.
Mist Edvardsdóttir skoraði 4 mörk fyrir Val áður en hún fór af velli um miðjan síðari hálfleik. Gunnhildur Yrsa Jónsdóttir, Elín Metta Jensen og Bergdís Fanney Einarsdóttir skoruðu allar eitt mark hver.
„Fyrst og fremst langar mig líka óska Mist til hamingju, hún er að koma til baka eftir krossbandaslit og skorar fjögur mörk og það er bara alveg geggjað. Hún á þvílíkt hrós skilið og bara liðið allt. Þetta voru mikilvæg stig, Fylkir er erfitt lið að mæta og við erum mjög ánægðar með þennan sigur,“ segir Gunnhildur.
Valskonur stjórnuðu leiknum frá upphafi til enda og Fylkir hafði einfaldlega engin svör. Leikurinn fór að stærstum hluta til fram á vallarhelmingi Fylkis og Valskonur þurftu ekki að hafa mikið fyrir þeim sjö mörkum sem skoruð voru.
„Við gerðum jafntefli við Fylki í fyrri leiknum og þær börðust allan tímann í kvöld en við unnum bara mikilvægan liðssigur. Þegar við vinnum svona saman er erfitt að brjóta okkur niður. Mér fannst Fylkisliðið ekkert slæmt, þær voru óheppnar í dag og við áttum frábæran leik og þær frammi voru að ná mjög vel saman og voru eiginlega óstöðvandi,“ segir Gunnhildur.
„Liðsandinn er frábær og það er gaman að vera inni á vellinum, þannig liði viltu vera í. Það sem við getum gert er að mæta af fullum krafti og spila okkar leik og stundum fellur það með okkur og það gerði það í dag.“
Fylkir var í þriðja sæti deildarinnar fyrir leikinn, og er þar enn eftir tap Selfoss gegn Þrótti fyrr í dag. Með sigrinum í dag eykur Valur forskot sitt á lið Breiðabliks sem er í öðru sæti deildarinnar en á tvo leiki inni á lið Vals. Valur mætir Breiðablik í sannkölluðum toppslag næsta laugardag, 3. október.
Eruð þið að horfa á leikinn við Breiðablik sem ákveðinn úrslitaleik í toppbaráttunni?
„Maður þarf að fara í alla leiki sem úrslitaleiki, hvort sem það er Fylkir í dag eða Breiðablik á laugardaginn. Öll stig skipta máli og við vitum alveg að leikurinn við Breiðablik er mikilvægur upp á titilbaráttuna, en við þurfum bara að einbeita okkur að því að spila okkar leik og ekki hugsa of mikið um það hvort þetta sé úrslitaleikur eða ekki. Við höfum bara gaman og gerum okkar besta, komum brjálaðar í þann leik eins og alla aðra,“ segir Gunnhildur.