Gott gengi Keflavíkur í Lengjudeild karla í fótbolta hélt áfram í dag er liðið fékk ÍBV í heimsókn. Urðu lokatölur 3:1, Keflavík í vil og er liðið því áfram í toppsætinu.
Davíð Snær Jóhannsson kom Keflavík yfir strax á 7. mínútu og fékk Joe Gibbs, markahæsti leikmaður deildarinnar, tækifæri til að tvöfalda forskotið á vítapunktinum á 40. mínútu. Það tókst ekki og aðeins mínútu síðar jafnaði Gary Martin og var staðan í hálfleik 1:1.
Keflavík komst aftur yfir á 50. mínútu þegar varamaðurinn Ari Steinn Guðmundsson skoraði. Gott varð betra fyrir Keflavík á 64. mínútu þegar fyrirliðin Frans Elvarsson bætti við þriðja markinu og þar við sat. Fékk Ari Steinn sitt annað gula spjald og þar með rautt á 78. mínútu en það kom ekki að sök fyrir Keflvíkinga.
Framarar eru áfram í fínum málum í toppbaráttunni eftir 2:1-útisigur á Vestra. Þórir Guðjónsson reyndist hetja Framara en hann skoraði bæði mörkin. Kom hann fram í 2:0 á 72. mínútu áður en Nacho Gil minnkaði muninn á 76. mínútu og þar við sat.
Í Grindavík sáu heimamenn um Víking Ólafsvík á fyrsta korterinu. Voru Oddur Ingi Bjarnason, Sigurður Bjartur Hallsson og Guðmundur Magnússon allir búnir að skora eftir kortersleik og staðan orðin 3:0 sem reyndust lokatölur. Oddur Ingi fékk sitt annað gula spjald á 64. mínútu en öruggur sigur Grindvíkinga varð raunin.
Staðan: