„Auðvitað er alltaf gaman að skora mörk en ég er ánægðastur með að halda hreinu,“ sagði Haukur Páll Sigurðsson fyrirliði Vals eftir 6:0 sigur á Gróttu í kvöld þegar leikið var í efstu deild karla í fótbolta, Pepsi Max deildinni.
„Við komum inní leikinn ákveðnir í að vera af fullum krafti, spila góðan varnarleik og líka bara heilt yfir því Grótta hefur náð í stig á erfiðum útivöllum gegn KR og Víkingum og voru óheppnir á móti FH svo við bárum mikla virðingu fyrir Gróttu og held að það hafi sýnt sig hérna. Grótta fékk dauðafæri til að skora í byrjun seinni hálfleiks og einhver skot en mér fannst við með góðan varnarleik og í heildina góðan leik hjá Val í kvöld.“
Fyrirliðinn sigur gott að vera með breiðan leikmannahóp, sem hafi náð betur saman í sumar. „Við þurftum að gera breytingar á liðinu en við erum með breiðan hóp og það skiptir í raun ekki máli hver kemur inná, allir taka sitt hlutverk og skila því frábærlega. Við byrjuðum mótið brösuglega en svo hefur verið góður stígandi í þessu hjá okkur. Þetta ár hefur verið furðulegt og þjálfari þurfti að gera miklar breytingar á sínum plönum en við erum með slípaðra lið eftir því sem líður á mótið,“ bætti Haukur Páll við.